बाळाचे पोट दुखत असेल तर काय करावे?

बाळाला असेल पोटदुखीचा त्रास, तर करा ‘हे’ रामबाण उपाय!
remedies on baby stomach pain in marathi
बाळाला असेल पोटदुखीचा त्रास, तर करा ‘हे’ रामबाण उपाय!
बाळ जन्माला आलं कि पहिले ३ महिने त्याच्यासाठी खूप संवेदनशील आणि नाजूक मानले जातात. याच काळात त्याच्या आतड्यांचा वेगाने विकास होत असतो आणि त्यामुळे त्याच्या पोटात गॅसची समस्या निर्माण होते. या व्यतिरिक्त जेव्हा बाळ ६ महिन्यांचं होतं तेव्हा त्याला खायला नवनवीन पदार्थ दिले जातात ज्यामुळे सुद्धा त्याला गॅसच्या समस्येला तोंड द्यावे लागते. पोटात हा गॅस अश्या अनेक कारणांमुळे निर्माण होऊ शकतो. ठराविक वेळी बाळाला आहार न मिळणे, दुध पिताना बाळाला ढेकर न येणे किंवा स्वत: आई डाएट वर असणे अशी अनेक कारणे पोटात गॅस निर्माण करू शकतात. अश्यावेळी बाळाला थेट औषध देऊ नये. सर्वप्रथम काही घरगुती उपचार करून पहावेत. समान्यत: अशा उपचारांमुळे बाळाला लगेच बरं वाटतं. आपत्कालीन स्थितीत हे उपचार प्रत्येक पालकाला माहित असणे गरजेचे आहे. जेणेकरून बाळाला प्राथमिक उपचार देऊन त्याचा त्रास कमी करता येतो. आज तुम्हाला हेच काही घरगुती उपचार आम्ही सांगणार आहोत, जे तुम्ही बाळाच्या पोटात गॅस झाल्यास वापरून पाहू शकता आणि त्याला त्रासातून मुक्त करून त्याच्या चेहऱ्यावर पुन्हा एकदा हसू फुलवू शकता.

ग्राइप वॉटर

ग्राइप वॉटर या नावाशी तुम्ही सुद्धा परिचित असालच. जन्मापासून बाळाला अनेक समस्यांवर हे ग्राइप वॉटर पाजले जाते. पोटात गॅस निर्माण झाल्यासही ग्राइप वॉटर खूप गुणकारी ठरते. ग्राइप वॉटर हे बाळाच्या पोटात उष्णता निर्माण करून गॅस काढून टाकते. पण हे बाळाला कसेही पाजू नये. एकदा डॉक्टरांचा सल्ला घेऊनच त्याला ग्राइप वॉटर पाजावे. यात आयुर्वेदिक औषधीचा समावेश असल्याने हे पोटासाठी खूप आरामदायी असते.
बाळाला ढेकर देऊ द्या

हा एक साधा सोपा घरगुती उपचार आहे. बाळाला दुध पाजल्यानंतर त्याने ढेकर देणे गरजेचे आहे. जर बाळ ढेकर नसेल देत तर त्याला काही क्रिया करून ढेकर देण्यास भाग पाडावे. दुध पाजल्यानंतर मुलाला हातात उचलून घ्या आणि त्याचे डोके आपल्या खांद्यावर ठेवून त्याच्या पाठीवर हलके हलके हात फिरवा व थोपटा. हि क्रिया तोवर करावी जोवर बाळ ढेकर देत नाही. या क्रियेवेळी अनेकदा बाळाच्या तोंडातून लाळ निघू शकते. पण त्यामुळे घाबरून जाण्याचे कारण नाही. हि सामान्य गोष्ट आहे.
बाळाला पोटावर झोपवा

बाळाला गॅसची समस्या झाल्यास त्याला पोटावर झोपवणे हा एक चांगला घरगुती उपाय आहे. गॅस झाल्याने बाळाच्या पोटात वेदना होतात. अशा वेदना दिसल्यास त्याला गॅस झाला हे समजावे आणि पोटावर झोपवावे. पण असे करताना त्याला जास्त वेळ या स्थितीत ठेवू नये. जास्तीत जास्त १ किंवा २ मिनिटेच त्याला पोटावर झोपवावे. जर तुम्हाला वाटलं कि या स्थितीत बाळाला अजून त्रास होत आहे तर त्याला पुन्हा पाठीवर सामान्य स्थितीत झोपवावे.
दुधाची बॉटल बदला

जर बाळाच्या पोटात सारखा गॅस निर्माण होत असले तर हि चिंतेची बाब असते आणि असं सारखं का होते आहे हे तुम्हाला समजत नसेल तर त्याच्या दुधाच्या बॉटलवर तुम्ही लक्ष देणे गरजेचे आहे. जर बॉटलवर असणाऱ्या निप्पलचे छिद्र जास्त मोठे झाले असेल तर ते त्वरित बदलावे. त्या छिद्रातून बाळाच्या पोटात हवा जात असल्याची शक्यता नाकारता येत नाही. अश्यावेळी पूर्ण बॉटल बदलणेही फायद्याचे ठरते.

(वाचा :- मुलांना मध खाऊ घालताय? थांबा....आधी हे वाचा!)
डॉक्टरकडे केव्हा जावे

जर बाळाच्या पोटात गॅस आहे आणि तुम्ही सर्व घरगुती उपचार करूनही फरक पडत नसेल तर अश्यावेळी डॉक्टरांचा लवकरात लवकर सल्ला घेणे उचित ठरते. जास्त उशीर झाल्यास गॅस सोबत उलटी, ताप आणि हगवण सुद्धा सुरु होऊ शकते. अशामुळे बाळाचे आयुष्य धोक्यात येण्याची शक्यता नाकारता येत नाही. म्हणून अजिबात वेळ न दवडता तुम्ही ज्या डॉक्टरकडे बाळाला नेहमी घेऊन जाता त्याच डॉक्टरकडे बाळाला उपचारासाठी घेऊन जावे.